Plume


نشوف في حياتي تعدّات، قدام عيني و مشات
لبدن معادش يحس يتأثر حتى القلب مات
الوجه ولى شاحب كيما الوردة إلي شاحت
الوردة إلي قلعوها من عروقها بش ارتاحت
نكتب في كلام ظلام مغلف بالأوهام
لبدن تعب، لعروق شاحت طيحتها ليام
الوقت ولّى رزين والدقايق كاينها سوايع
عقارب المنقالة تدور وانتي في وسطهم ضايع
حياتك كي السمفونية المعزوفة بلحن حزين
تعزفها وإنتي مخنوق حتى مالنفس تحسو رزين
تحب تعرف إنتي وين، إنتي في الا مكان
إنتي ورقة خريف طاحت، لعب بيها الزمان
لي يغيض مش طريقك إلي مافيهوش رجوع
أكثر حاجة تغيظ كي تجي تبكي وما تلقاش دموع
تلقى البدن موجوع، ماعدش عندك صوت
الدنيا تولي بلا طعم كاينك تمثال منحوت
العينين تذبل وتطيح، ماعادش تعرف النوم
حتى كي تهزك عينك تتمنى ماعادش تقوم
تتمنى ماعادش تشوف، تصويرتك البلا ألوان
تتمنى قلبك ياقف خاطر يدق كان أحزان
تتمنى ماعادش تبان وتغرق في النسيان
تتمنى تفيق مألكذبة إلي سماوها الإنسان
كل ما تجي توصف إلي تحسو ما تلقاش كلام
كل جواب تلقاه يزيدك نقطة إستفهام
بلا إرتكاز في الفراغ تحس روحك تدور
تحس روحك نقطة بلا حرف ضايعة بين السطور
تحس السطور تتركب تمشي في نفس السياق
قبل ما تركب المعنى تتبخر في الآفاق
تحس أفكارك تهرب منك، مخك ولى شارد
الدم تجمد في عروقك وبدنك ولى بارد
ماعادش عندك إحساس لا بالمكان لا بالوقت
تحس روحك بلا صوت كاينك عمرك ما نطقت
تبدا تتبخر وتذوب حتى تولّي عدم
الحاجة الوحيدة إلي تحسها غادي هي الندم
تذوب كالسراب وتخرج من الوجود
تتبخر، وحد ما يحس بالي إنتي مفقود
ضايع في المجهول، حد ما حاسس بيك
حد ما يحسب معاك الليالي إلي تبكيك
تشوف حياتك قدامك تذبل وتذوب كالشمعة
الشعلة إلي فيها تضوي تطفى مع آخر دمعة
تولي ماعادش ذات، تولي ذكريات
تصاور فاها برشا وجيعه و شوية ضحكات
تصاور فيها برشا وجوه كانت قريبة ليك
بدات تتلاشى مع الريح، بدات تمشي وتخليك
تحس يديك رزينة، كي تجي تمدها في الظلام
تحب تشد الوجوه تلقاهم سراب وأوهام
كل شي يتلاشى قدامك كل شي معاد يبان
الوجوه إلي تلوج عليها ضاعت وسط الدخان
تحس روحك كي الرماد إلي خلفتو النار
الدنيا تهزك و تجيبك الريح تنفخ عالغبار
محصور بين الحيوط حتى مالإحساس يموت
كل شي ساكن وجامد كاينو مفماش صوت
وراق حياتك ذبلت، شاحت، ولات جامدة
تشوف في الدنيا تتحرك وإنتي كي الجثة الهامدة
تحس الوقت واقف العباد تجري وإنتي بركا ساكن
قلبك بش ينفجر تصيح وهوما يشوفوك ساكت
غاديكا تفهم إلي في الدنيا معاد عندك شي
ما فمش حاجة في الدنيا تخليك بش تقعد حي
ماعادش فما أمل في غدوا ماعادش طموح
القلب حزين ما يحلمش كيف يبدا مجروح
في اللحظة هاذيكا تغزر للمرايا
تشوف تصاور حياتك تتعدى كيما الرواية
تحب تكتب النهاية يتكسر في يدك القلم
كيما تكسرت أحلامك، ماتت ودفنت تحت الردم
وقتها ترجع في يدك ورقة و قلم
في عصر الجهل وإنتي تحاول بش تكتب حكم
تحاول تكتب كلمات ليست كالكلمات
تكتب تاكست معبي يلخص معنى الحياة
تحاول تكتب تاكست يلخص معنى البشر
معاني تحكي عالصراع بين الخير والشر
تولي مجهول في عصر الجهل كيف تكتب عبر
لعباد لي حكاتو في ألبوم تحكيه إنتي في سطر
سطر فلو بش يتفهم لازمو برشا تفكير
لازمو قلب يحس و مخ بش تلقالو تفسير
كل كلمة عندها معنى، كل معنى عندو معاني
وذن تبع و تفهم وذن تسمع وتعاني
رابك كيف البحر في وسطو السؤالات تعوم
لي يغرق في المعاني ما يفهمش يبدا يلوم
رابي لابس غاز ماسك خاطر كلامهم مسموم
لعباد تشوفك مجهول و كلامك ماهوش مفهوم
هذاكا علاش الكلها قالت ساي قلمو وفى
القلم مازال يكتب أما البوبليك إلي إنتهى
اليوم الراب مرض وقعد كان قلمك دوا
كان هكى يموت القلم خليه مالا يمشي فداء
خليه مالا يتدفن مع ألورقة في قبر
قلمي مر وكان نقعد تو نكتب ما أمر
تهمة متاعو كلام رزين حكموه بالإعدام
حتى الراب كرهكم بدل إسمو بسيكو ام
حكمو عليه إعدام و التهمة راي برشا كتيبة
وين البوبليك يحب تيتر ما يفوتش تلاته دقايق
كي تحكي كلام رزين و موزون هوني تولي مصيبة
لعقول مخدرة دايخة وإنتي تحكي عالحقايق
ما بقاش الفايق، البوبليك يتبع كالقطيع
يخون و يغدر يتكلم و يحكي عالوفاء
رابك بلاش أما بخلافك الكل قاعدة تبيع
تيتروات عالشجاعة تكتب الجبناء
أنا نكتب لي برول متاعي مش هي تكتبني
في تونس لعباد لي تكسر تسب في لعباد إلي تبني
وقت تسبني و وتقلي كلامك عمرو ما يعجبني
لا قلت لعباد تصفقلي ولا قلتلك حبني
كان ما تشوفش كلامي فور خاطرو ميتافور
من أول نهار في الراب عرصة مش كيفهم ديكور
تحب كلام ملفق، أحنا كلامنا موزون
كلام ينقبلك مخك كيما طبقات الأوزون
أحنا رابنا ذهب في بلاد تحب الفالصو
كل ما يكون الفن تافه كل ما الدولة تخلصو
على قد طحينك قد ما تجيك لفلوس في ماصو
شكون مازال صادق و يكتب لكلام لي حاسو
تفكر في عصر الظلم قلمك كسر لقيود
بوبليك كان كاسح وكنت تشد لقلم فرحان
ليوم لقلم حزين خاطر الي كان ماعدش موجود
البوبليك نسى التاكست ومشا تبع الالحان
لي يغني درج في هالبلاد يولي عم الطيب
كلامي قوي يوصل وحدو ما يستحقش فايب
صوتهم بلا دي زإيفاي كيما وجهم خايب
الكروسة صحيح تعاون اما ما تقومش العايب
يقولولك رابك مات في بالهم الراب يتوب
يقولولك قلمك شاح كيما الشمعة قاعد يذوب
ما تجاوبهمش تعرف رابك محفور في القلوب
الشمس تغيب أمّا ما تطفاش بعد الغروب
خاطر بالوضع واعي . باش فسر لا داعي
الظاهر لعباد اليوم ماعادتش تفهم لكلام متاعي
رابك ممنوع ما يتعداش في البث الإذاعي
كلامك مكروهفي بلاد السم لي تنشر فيه لافاعي
مشيت على الجمر و النار
و كل واحد يعرف روحو وقت يخزر في الميروار
نقعد جبل موش كيفهم نتكسر كي البلار
المفاهيم تقلبت و الهزيمة ولا انتصار
صيد بانيابو يخوف لوحوش في الادغال
أما الصيد اليوم تحصر و تحبس في السيرك
الجمهور صفق للقرد خاطر الصيد كانيبال
رابك عند هيبة ادو الجمهور صفق لغيرك
البيبليك يحبك تتكلم و تكسح ف لكلام
متخبي ورا ليكخو و يقولك ازطم للقدام
نهار يشيلوك يرميوك في حبس ظلام
أمك وحدها تبكي عليك و الكل تحط لك جام
موش إنت لي تعلمني و توريني كيفاش نغني
موش أنا لي نراضيك و نتبدل باش تفهم فني
موش إنت لي حياتك ضاعت، إنت اقدارك تتفرج 
موش انا نوسع لك بالك بغنايا مانيش مهرج
ماهوش لفْلُو موش اللحن لي يخليك تفيق
موش أنا لي نخرج راب و كلام كلو تلفيق
موش إنت قلمك لي خلا طريق قدامك يضيق
موش أنا لي نعمل الراب ونستنى في التصفيق
قداش باش تقعد تحارب و لعمر يجري بيك؟
قداش باش تبقى تفسر و تكتب كلام عميق؟
قداش مازلت بش تكتب تِيتْر أنالِيتِيك؟
قداش باش تبقى تشوفك لعباد دُونْجي بِيبْلِيك؟
غيرك يختار الراب لي يتعدى في المذياع
و انت مازلت واقف كي صيد بين الضبااع
الرابورات لبست ذهب و الجمهور لبس قناع
يْنَبَّر عليك و بمشي يركع للراب لي يتباع
هذاك علاش ما نغني لحد. ما نغني كان لروحي
العالم هذاك لي تحلم بيه لي زَارْتِيسْت موش طموحي
عندي قلم ما يركع ما يعرف استسلام
يقد يحارب في عصر جفت فيه لقلام
يقعد يكتب وحدو خاطر ما عندوش أصحاب
ما فَمَّا حد تحكيلو. طلي تحسو تحطو في الراب
تحكي فيه على أقرب لعباد كيفاش دور
تحكي فيه على الدنيا بمعنى متخبي بين السطور
الدنيا ماهيش طريق مسطر. الدنيا معبيا حفر
تحاول تمشي فيه ماطيحش حتى يفوت لعمر
لحفر تْغَّلَّط كان تزَّلَّل و تزلق و طيح
تقعد وحدك و حد ما يسمع صوتك وقت تبدا تصيح
هكا الدنيا تلعب بيك كيف الموج في لبحر
مهما تكون عوام نهار لي تغفل تتغدر
ساعات كي تهيج الموجة تلزك للاعماق تغوص 
الدنيا تلزك تعيطلك (.) باش تعطيك دروس
كل ما تقول تعلمت تزيد تعطيك سطاج
كل حقيقة توصلها ف لخر تطلع لك مِيراج
العبد يعدي حياتو كلها ف لاَ بْخُونْتِيسَاج
ادرس ما توفاش و كل درس يخليك عبد ساج
ليام تجري مع كل درس تخرج عبد جديد
عبد تعلم من الماضي نتاعو ولا يخزر لبعيد
مع كل درس تزيد تطلع لنياب في فم الديب
حضرها للعباد لي في ظهرو عملت العيب
العبد يغلط و يصيب. أما فَمَّا غلط من غلط
قداش من صاحب مع الطحان إطحت
هنا في بلاد لعفط كلها تحكي على الوفاء
لي معاك راجل في الصبح يولي طحان في المساء
تعبد في النساء . تنسى الرب لي خلق
العبد توا ولا يكذب حتى كان صدق
خاطر قدام الشق. العبد يولي رخيص
عادي يبيع صحابو ب 200 غرام أحاسيس
خاطر العبد الخسيس كيف لكلاب لي ما تنبحش
قدامك تتلبك .في ظهرك تنقز ما تركحش
قداش من ضبع يحب الفضلة يحب يلعبها وحش
سامحني ربي كرهت عبادك صحبتهم ما تربحش
وجوهم ما تفرحش. قدامك تبتسم
وقت لي تتلفت ما تلقى ان السم
الذكورة تنقسم ، كل واحد عندو تصنيف
فَمَّا الراجل، فَمَّا الكلب لي يلعبها عفيف
ساعات تسكت و تَّلِّف باش ما توليش عنيف
خليهم وحدهم يطيحو كيما وراق لخريف
أمَّا لعباد ما تفهمش في بااهم أنك ضعيف
ما يعرفوش ورا الضحكة فَمَّا وجه مخيف
عمرها تغرني العين، نخزر طول للقلب
حتى من غير ما تتكلم، من داخل نعرفك كلب
في ظهرك أحذر عقابك أما من غير ما نحلب
ما توصل تتعلم ما تدرس في الدنيا كان ما تجرب
هذاك علاش ديما وحدي ما نخالط حد
لقلوب كحلة و لمخاخ معبية بالعقد
نقعد للأبد غامر و يشوفوك فلو
نقعد نشوف فيهم قدامي كيفاش يتحركو سلو
نفس لكذب و الماسك يتعاود إيفري نايت
القلب لكحل و المخ الخامج و الفم الشايط
لي طحنو في المسانجر تمشي تلحسو ف لايت
تقعد عبد رخيص ما تغلاش كان تحط لحطايط
كلها ولات دي مارك و يشوفوك ما تسوا شاي
يفيس عليك بالفيرزاتشي لي شراها بنص الباي
الميت يضحك على الحي. الجعان يضحك على لي شبع
تشا تضحك على العذرا .و صيد يضحك عليه ضبع
ما تحكي ليش ع الوجيعة نعيش فيها كل يوم
لي نعيشو قبل ما نرقد يتعاود وقت لي نقوم
كذب و نفاق و هموم،و لصحاب لي ما دوم
لصحاب لي تعطيهم قلبك و يبيعوك برخص السوم
طيح لي ماسك حتى من غير ما يتكلمو
يسبو بعضهم في ظهرهم و كيف يتقابلو يسلمو
كلها ما تعرفشي السوق أما يحبو يقلمو
لي يزلق و يطيح يقول لك الوقت ظلمو
الوقت ما يظلمش. احنا ظلمنا بعضنا
لعباد لي عملنا معاهم الباهي كيف لكلاب تعضنا
و طلع لي داوا مرضنا. مريض ماهوش طبيب
كيما الراعي لي يحمي لغنم و ف لخر يطلع ذيب
و صعيب لكتيبة تقص وقت كي نشد لقلم
مع كل حرف و كلمة تزيد لوجيعة تتلم
في يدي لقلم يقعد يكتب إلى ما لا نهاية
يكتب كلام تشوف في روحها كيف لمراية
مانيش كيفهم ما فمَّا شي يجمعنا
ما عناش نفس البيبليك و لعباد لي تبعنا
المعاصي تذلنا و كان الطاعة هي لي ترفعنا
حاجة الوحيدة كي بعدنا على ربي هي لي توجعنا
عمري ما نرمي المعنى. كلامي ديما ديريكت
تلبز مورايا في ظهري و نقعد نخزر لك ساكت
نغلط مانيشي كامل أما عمري ما نجامل
نمشي معاك راجل و كي تغلط نولي الدمار الشامل
ماني طالب شي من دنيا. أنا لي عندي يكفيني
ما فما شي حد في دنيا نتوجع وقت لي يخليني
دموعي شاحت في صغري اليوم شي ما قعد يبكيني
الكتابة تنسيني. هذاك علاش لي نحسو يترجم في حروف
في عصر وين الشهرة فايك و الفنان ملهوف
نقعد زيرو مليم ما نعملش من البيبليك مصروف
خلينا لوطا عبد بسيط و نموت فيلسوف 
يمكن كي نموت بلادي تو تعملي قدر
يمكن كلامي في المدارس يتقرى عبر
يمكن يوفى الراب كي نكتب انا اخر سطر 
يمكن وقتها أنا نحيا خاطر بلادنا قبر

Aucun commentaire:

Enregistrer un commentaire